لا عادها الله من سفريه الجزء الاول !!!!

جرت احداث هذه القصه في صيف عام 2003 م .... اسماء الشخصيات غير حقيقيه .... هذه القصه سترى النور قريبا في شكل مسلسل تراجيدي مكسيكي بطوله اليخاندرو صنيتان و مزنه انطونلي ...





@@@@@@@@@@@@@@

تعرفون ان الصيف عندنا قارس ويخلي الواحد يتحكحك من البلاوي اللي تطلع منه ... لدرجه ان الواحد وهو يتروش تطلع ريحته اصلا هو يتروش رفعه عتب والا الترويش ما فيه فايده لانه الواحد وهو يتروش عرقه ينزل وريحته طالعه اضافه الى ان الترويش في بدايه شهر يوليو عندنا يعتبر سلق للجسم ....

لكل ما سبق قررت اني ابورد هالصيفيه واسافر للبراد طبعا مو لابها ولا الطايف ولا حايل اللي صيفها هايل يقولون واصلن انا خبل اروح لهالاماكن اللي اروبا ارحم من اسعار فنادقها والا بالله غرفتين ومنافعها باربعميه وخمسين ...

وين حنا وين عايشين ...

المهم قررت اروح برى (( يعني وين حدي سوريا والاردن والا لبنان بعيده عن شواربي وشوارب الحاضرين ))

المهم رحت وقدمت اجازه خمسطعش يوم لان الرصيد هذا هو ويوم شيكت الجواز الا هو مخلص وانا اللي اروح للجوازات واطق هاك الصوره اللي على كيف كيوفك واعطيها للموظف ومعها ثلاثميه ريال قيمه الجواز الا قولته يابو الشباب عليك مخالفات رحت سددهن وتعال ...

رحت للمرور الا هي زحمه سلنتح من الشباب مثلي وشرواي يبون السفر وحجر لهم النظام الجديد الله لا يوفق من اقترحه وضيق على المسلمين ،،وكلن جاي يطلع برنت الا قوله الموظف اللي مسوي فيها مهم :-اعوذ بالله منكم يالسعوديين (( اخس يالتايلندي )) ما تسددون الا اذا بغيتوا تسافرون وانا ارد عليه من حارق في اقصى شراين قلبي زحف حتى كبدي وقلت له الحين نزل كاسة الشاي يا بو الشباب ولا يكثر ومشنا وبلا حكي ماله طعمه <<<<< يتعلم سوري بروفات .....

المهم خذيت البرنت الا هي مخالفات ادري عنها وبعضها والله تجني وعدوان والا هي يا طويلين الاعمار الف وخمسميه ريال (( قطع اشاره + سرعه + موقف غلط + هروب + مسيره بعد مباره الهلال والاهلي )) ومن هالحكي الفاضي ...


مالكم بالخرابيط ذي رحت البنك والا هو زحمه و من زين التنظيم عندنا في دول العالم السابع ما فيه الا موظف واحد بس للجوازات و كمبيوتر واحد ولطعه يا شباب من الساعه تسع الى اثنعش الا ربع المهم مدري هو حظ والا معاند لي ...

يوم وصل دوري وهو تعن للموظف روحه للسي دبليو عزكم الله والظاهر ان معه شد عضلي بعينه والجهاز العصبي للخشم فيه مشاكل فتاخر ابو الشباب ساعه كامله ويوم جا الا الجهاز خربان وانلطعنا نص ساعه لين صلحوه و انا اللي اسدد واروح البيت وانام لين ثاني يوم من التعب ودبله الكبد ...

المهم ثاني يوم رحت الجوازات و دخلت بقوه عين وانا اجي الموظف بكل ثقه قلت خذ الوصل وعطني الجواز الا قولته يابو الشباب رح صور صوره خلفيتها بيضاء وانا اللي انقز بحلقه ولا حسيت الا انا فوق الكونتر من القهر يبن الناس ليه ما قلت من اول الا قوله الضابط انت ما سالت قلت طيب ياخخخخخي حطوا تنبيه لوحه عليها تعليمات جديده الا المرجعين علشان الصور فوق الخمسميه مراجع ...وانا اللي اسب على الضابط طبعا بيني وبين نفسي واقول يلعن ابو الواسطه اللي خلت دلوخ مثلك يخشون الامنيه (( منقهر انه ما خش الامنيه لان خشمي منحرف )) لاحظوا خشمي مو اخلاقي يعني ...

المهم رحت صورت صوره بيضاء وجيت ثاني يوم وكان يوافق ربوع واروح لخوياي واوقع دخول وخروج بنفس الوقت لاني اجازه واروح للجوازات ومعي الصوره خلفيتها بيضاء كننا معريس مو جواز حشى ... المهم الظهر صليت ورحت وعطوني الجواز وطلعت وانا خسران نص الميزانيه للسفريه وهي الف وثمنميه ريال هي كالتنالي ...

1500 = مخالفات

300 = قيمه جواز كهربائي عفوا قصدي ممغنط

20 = بنزين روحه جيه للجوازات

20 = صوره خلفيتها بيضاء

10 = عطيتها شحاد عند الجوازات ...

المهم قبل ما انهي الجزء الاول كان فيه شباب زلايب مكلميني اخاويهم قبل وانا رافض ولكن بعد التدهور الاقتصادي اللي جاني قررت اخاوي خويا الغفله وبالجزء الجاي اعلمكم عن فاجعتي بحقيقه خوياي وقصتي مع شريط فارس مهدي و شريط شيرين وجدي وقصه ابو حسان ورزفه على شريط الكسرات هز الوسط من حمودي على شريط شيرين وجدي وقصتي مع شريط نوال الكويتيه .....

هههههههههههههههههه

حلوة

هلا فيك نورت المنتدى يالغالي ان شاء الله نشوف منك كل شي حلو ومميز
تمنياتي لك بالتوفيق

حلووووووووووووووووووووووووه
ياخي عد دريهماتك قبل ما تفكر تسافر!

حلوه .......... وكثر منها

زيزو .....




وانت احلى .....

هلا ورود


منور بوجودك ....

kamaksa2000


هلا يالحبيب الدريهمات موجوده بس ماش حظ الله يسلمك ويسمنك ويخليك ... ويطول كرعانك ويزوجك ...

الفقعان



اسمك احسه ماله داعي بس انت احلى عموما .....

مشكوووووووووووووور