ـألـتِـمـثـَـــآل ..
عفا الله عن خطا غدر الخناجر والضلـوع ابطـال
بسامح واتركـك تحـت الظـلام الحالـك لحالـك
دخيلك وفر دموعـك تـرى هـدر الدمـوع اذلال
وترى ما فيه أحد يصبر مثـل صبـري بغربالـك
انا عيب علـي أنقـض كلامـي والرجـال افعـال
واذا قلت اقطـع احبالـك ترانـي بقطـع حبالـك
عشان اكسب هدب عينك تجرعت العـذاب اشكـال
وليتـك تـرأف بحالـي علشـان ارأف بحـالـك
مسوي فـي حياتـي شـي مـا يذكـر ولا ينقـال
حشا حتى العدو وهو العـدو مـا يعمـل اعمالـك
تمسيني علـى الهـم وتصبحنـي علـى الغربـال
تقلطنـي فناجيلـك وتقـصـر عـنـي دلالــك
تحملت التعـب لجلـك وانـا حملـي يهـد جبـال
رحلت من العـذاب ومـا وقفـت الا علـى جالـك
علامك كل مـا جيـك متواضـع جيتنـي تختـال؟
معاك اليا متي بصبـر وصبـري معـك يحلالـك؟
مثل ما اقبلـت لعيونـك لـزوم تلـد لـي باقبـال
ومثل ما قد حشمتك حس واحشم قلبي اشوى لـك
أنـا محـدن بجابرنـي أسايـر معـك هالمنـوال
ترى لانـي تبيـع لـك ولا نـي باصغـر عيالـك
أنا جيت اعشقك نبض ومشاعر ما اعشقك (تمثال)
أنا جيت اسكنك واحياك وابقى فيـك وابقـى لـك
أنا جيت بظما عاشق تعب يطـرد سـراب الـلال
أنا جيت استفز رضاك مـن فرقـاك والجـا لـك
أنا ما همت بك عاقل أنـا كنـت اعشقـك بخبـال
أنا ما كنت احبك حي أنـا كنـت اعشقـك هالـك
تخيل من كثر مـا اخـاف تلقـى للزعـل مدخـال
أخاف اخطي على طيفـك وادوس برجلـي ظلالـك
تبعتـك والعـرب تتبـع رعـود البـارق الهمـال
وانا شفت المطـر يتبعـك فـي حلـك وترحالـك
كأن اللي خلق حسنك خلقني مـع جسـدك ظـلال
وصرت اقرب جسد يمشي معـك باقفـاك واقبالـك
أبـي قلبـك يحـس انـه فقـد بمحبتـه رجــال
ملكته من هدب عين وخسـرت رضـاه باهمالـك
صحيح ان الفراق اقسـى ولكـن الوصـال محـال
أنا صعبن علي أرضي غـرورك واضعـف قبالـك
بعـد مـا حققـت عينـي فبعـدك للرقـاد امـال
أعود للسهر؟ -- يا خـوي فـال الله ولا فالـك!
ببدل نظرتك فيني واجـي لـك كـل يـوم بحـال
بكون اقـرب مـن ثيابـك عليـك ولا تهيـا لـك
بلمك وانثرك واجمعـك وارجـع وانثـرك باهمـال
بخونك وازعلك وارضيك وازعل منك وارضى لـك
أبرسم بالثرى وجهـك وابدفـن صورتـك برمـال
أبشكي للعـرب فرقـاك واضحـك عنـد عذالـك
أبهديك الوصال فـراق واهديـك الفـراق وصـال
بسوي مثل مـا شوفـك تسـوي وافعـل افعالـك
عشان تعرف من فينا الزعول ومن وسيـع البـال
أبيـك تـذوق فنجالـي وانـا بــذوق فنجـالـك
نصيحة واحتفظ فيها قصر معـك الزمـن أو طـال
أبي تسمـع كلامـي زيـن وتحطـه علـى بالـك
اذا حبك هبال اطفـال لـك عنـدي هبـال اطفـال
ولا --- وابشر بعد بهبال حب ٍ ما هـو بهبالـك
واذا قصدك تهين اسمي عشـان تشمـت العـذال
ترى لا انته ولا غيرك --- ولا عشرة من اشكالك
