اهل الجنوب - الجمهرة

(( اهل الجنوب ))

وعيني اللي كل ما ذعذع من الغربي هبوب
يحلى لها لون الغروب اللي يذوب قبالها
ويا ويل حالي كل ما يحلى لها لون الغروب
تطري لي سالفة الريم اللعوب وسالفة ترحالها
وعزه الله ان كل ما تطري لي الريم اللعوب
حرمت ادم ايدي على حاجة وانا ما اقوى لها
ما سافرت ريم الفلا صديت عن كل الدروب
مهو قصور بالعذارى بس ذيك لحالها
من فارقتني ما خطف قلبي من الحور محبوب
ولا لقيت الجادل اللي تستحق احيا لها
لان القلوب ان ما وفت لأحبابها ماهي قلوب
والعشرة اللي ماترد الروح ما نسعى لها
اما الوفا اللي يستر الرجال من كل العيوب
ولا الجفا اللي يستر عيوب العرب فرجالها
ما اقسى من فراق الجنوب الا فراق اهل الجنوب
ويلي على اللي كل ما تزعل تشد رحالها
اللي مذريها العتب لا صدت بصدري شبوب
عيبت اراضيها وهي عيبت طول بالها
كانت معي مثل النصيب يحدني من كل صوب
كانت دروبي من متاهات الظلل لظلالها
كانت هروبي لشعرب اني بحاجه للهروب
كانت سماي اللي ليا ضاقت علي ألجى لها
ليه تحداني وانا في كل الاحوال مغلوب
ليه حرمتني من قهر عذالي وعذالها
ليه تجاهلني وانا ماني جبان ولا كذوب
ليه رخصة دمعي وانا ما بكي الا لها
ما ترحم اللي له سنة كنه على النار محطوب
ما هزها دمع الفقيد اللي فقده طلالها
ما خافت تهدم السنين اللي بنتنا طوب طوب
ما فكرت تشفق على حالي وترحم حالها
قولوا لها لو ما تذوب انا بخليها تذوب
قولوا لها لو ما عنت لي مستعد اعنى لها
اليا جمحت لي هالخطى بجمح لها كل الذنوب
وان جابت الحسنة معي تبشر بعشر امثالها
افرش لها بصدري وطن واجمع لها من ضلوعي شعوب
وارقى لها المكانة اللي ما حدن يرقى لها
ان كاني مخطي فاني ماني خلي من العيوب
الذنب يغفر والبشر تجزى بقدر اعمالها
البعد قاسي والفراق يضيق الصدر الرحوب
وانا تعبت ادور الحيله وارد احتالها
قولوا لها ترجع ترا ماني على الحزن مغصوب
ولا ترا نذر علي انه مهو بأشوى لها
اما تترك هالهبال وتترك البعد وتتوب
ولا تبشر بالهبال اللي ما هو بهبالها
كافي زعل ترا الظروف مقفله من كل صوب
وانا حملت من الهموم انواعها واشكالها
يكفيني اني كل ما هبت على صدري هبوب
تحن عيني للجنوب وتلفت بالحالها
والمشكلة اني كل ما حنت عيوني للجنوب
تطري لي الريم اللعوب وسالفة ترحالها
وعز الله كل ما تطري لي الريم اللعوب
حرمت امد ايدي على حاجة وانا ما اقوى لها


=-=-=-=-=-=-=-=-=-=-=-=-=-=-=-=-=-=-=-=-=-=



(( الجمهرة ))

اي بالله اخطوا والخطى جابهم عين الصواب
مبطي وانا اشوف الطمع يكشف رداهم واستره
ما يملي عيون الحسود في هالزمن غيرالتراب
ومن لا يتوب من الخطا ترحم عليه المعذرة
اللي من اولها خراب اكيد تاليها خراب
والبندق اللي ماتثور في هدفها تذعره
ودك اليا من جاتك الغلطة من الناس القراب
الصاحب اللي ما كسبت محبته ما تخسره
مشكلتي اني ما عرفت افتح لصدتهم حساب
قلطتهم صدري عبى ذكري قصيد وحنجرة
صوت يصول فمنبره وخطاب ما مثله خطاب
والطيبه اللي زعزعت صوت الخطيب ومنبره
ما فيه دمع صوبوه احبابي بوجهي وخاب
ولا زرق غالي ولا فـــج نـــحره
كل الزهاب اللي معي ذكره من اصحاب الزهاب
واللي بقى لي من عذاب اشرس طريقي واخطره
لاني تجنب الغرق عديت من فوق السحاب
لان اكثر اصحابي ورق ما شفت لطيب ثمره
والله ما حطيت بين الحدق والخوه حجاب
حتى غدو ربعي يحدوني على الضيق اشكره
البارحة ثارت علي الرقاب واواتني الرقاب
البارحه ياثقل دم البارحه ويا محقره
هب يا وجه الحسد وشلون جمعهم وغاب
كيف السنين اليلي عطتني بعثرتهم مبعثره
اثر المصايب ما تجيل الا من الناس القراب
وبهالزمن حتى الرفيق اللي تثق فيه احذره
لا بارك الله في رفيق تزعله كلمة عتاب
ولا جمع الله الرجال اللي تفرقهم مره
عودت نفسي كل ما شديت لليمه ركاب
ما صد وجهي عن طريق الا ليا جبت خبره
الصاحب اللي ما يجي من صحبته غير العذاب
نذراً علي ان ما هجرني ولا انا اللي بهجره
من يفتح لفرقاي باب افك له عشرين باب
واذا خوي ما يقدر خوتي ما قدره
ان روحو فأنا بري منهم ليوم الحساب
وان جرحوا قولوا لهم ما حركوا في شعره
شفهم حول السنة ولا خذوا مني جواب
احسن دوا للي يحاول يستفزك تحقره
انا جمعت اوراقهم بكتاب واغلقت الكتاب
يا وقت لم اللي تلمه وانثر اللي تنثره
ما كنت احاتيهم صغير عاد احاتيهم شباب
ان ما ذخرني صاحبي لليوم الاسود ما اذخره
عقب اكتئاب البارحة ما عاد انا حمل اكتئاب
الضيق جرجرني وانا ماني بناقص جرجره
اللي يخاف من الظمى يترك لنا طرد السراب
واللي مهو بقد الظلام ووحشته لا يسهره
انا تجرعت العطش لي احترق وجهي وذاب
انا كسرت بخاطري قبل الصداقة تكسره
انا خسرت اللي غيابه غير عن كل الغياب
انا غفرت العالم اللي ما تستحق المغفرة
انا اكثر الانسان تعلم من كثر ما اخطى واصاب
انا آخر انسان يتكلم في زمان الثرثره
انا القصيد اللي فزع من دفتره مليون ناب
وانا الوحيد جمع مليون ناب بدفتره
جفني وجرحها السهرحيلي وهدتها الصعاب
دمعي هدر ,, ضحكي ندر .. عمري وضيعت اكثره
شيبت فعقول العرب ,, هيبت روسن ما تهاب
جمهرة ناس عمرهم ما يعرفون الجمهره
ما صرت ذيب الا لأن اللي حواليني ذياب
ما كنت اغيب الا لان العفو عند المقدرة
ترا حلاتك لا حملت لصاحبك كلمت عتاب
ان ما نطقت بها بوجهه ما تذمه بظهره
في هالزمن ما يملي عيون الحسود الا التراب
ولا الحظيظ الطلقة اللي ما تصيبه تذعره
ودك اليا من جاتك الغلطة من الناس القراب
الصاحب اللي ما كسبت محبته ,, ماتخسره


للشاعر : حامد زيد