الى الشباب وبس والبنات برضوا عشان هماحبايبنا

والصلاة والسلام على حبيبي محمد

مساء الأنــــوار والأزهــــار والأمطــــــار

مساء العطـــــور والســـــرور

مساء الساحه والقلوب المرتاحه

مســـــاء الآفـــــــــــــــــــــاق ودجاج البيك الحــــراق <<< ياحبي له

حياكم الله كلٍ بـــإسمه

عندنـــا الله يسلمكم سواق إسمه البشمهندس رشيد من الهند أول ماجانا كان سواق سيكل

بس الوالده الله يحفظها وجهت توجيهها الكريم بترسيمه وترقيته على ملاك سائق سيارات

رشيد هذا رجـــال طيب وخلوق وممتاز ويصلي كل الفروض في المسجد

ومن مميزاته العظيمه إنه عنده بـــريك من 4 _ 7 وحارتنـــا وقتها كلها تدوخ من ريحة الدجـــاج الكــاري بالفلفل <<< الحبيب راح راتبه كله في الحبحر

بس مشكلته طويلة العمـــر على الطاعه الوالده الغاليه ماتحبه ...... بتقولين ليش ....!!!

بقولكم لأنه يمشي 60 والغاليه تبيه يمشي 120 <<< مايمديكم على الوالده دايم الله يحفظها تساير إيقاع العصر السريع ....

ودايم تحب تعلمه إذا قــرًب يخلص البنزين لأنها مراقبه جميع أجهزه الملاحه في السياره <<< عشان تعرفون إن هذا الشبل اللي هو أنـــا من ذيك الغاليه اللي هي أمي

ورشيد هذا ياجماعة الخير مثله مثل الكثير من الوافدين في البلد ينظر للشاب السعودي على إنه مترف ومنعم ويلبس الثياب الفاخره ويلبس الكاجول ويأكل في المطاعم الغاليه ويسوق أفخم السيارات فقط ويطلع يرقص مع الدرايش سواء فاز المنتخب وإلا أنهزم <<< من جد شي غريب

ويطلع يرقص على ( الله الله يا منتخبنا ) في اليوم الوطني

لدرجة إن رشيد يشوفني أسقي الزرع في حوشنا فــ يستغرب ويقرًب مني على إستحياء وخجل ويقولي : مستر آفاق ..... إنتا ســـأودي ...!!!

وأقول في نفسي : وأنــا ولد أبوووي ...

وأطمر وألبس الثوب والشماغ وأرسم بالكوبرى وأجيب بطاقة الأحــوال وأجيه

فـ يستوعب الوضع من جديد

رشيد هذا مسوي فيها قدامي الرجل العصامي والمكافح .... مره يقولي رايح البنك أحول فلوس لزوجتي و22 بــزر ..... ومره يقولي عنده 25 بــزر

ومــره يوم إن الله نوى يفضحه جاء وقالي : مستر آفاق أنــا يبي يروح هند عشان أنــا في جواج

قلت له : طيب والأولي فــ أنلخم وأكتشفت بعدهــا إنه مابعد تزوج أصلاً ...!!!

وبعدين وشلون 25 بــزر وعمره 30 بس .... وشلـــون جابهم <<< كان من أول والله من الذهانه بعد

جلست لحالي قبل كم يوم وتذكـــرت حال البلد وأهـــل البلد <<< يناظر الأســهم بحرقه

وتذكرت البيت اللي يقول

الغـــرب يصنع طـــائرات وصواريخ ...... والشرق الأوســـط راح نفطه بلاشي

وأقـــول : إيييييييييه على الشباب اللي ضــــاع <<< آفاق مسوي فيها عمره 88

وأقول في نفسي ليه الواحد فينا صار همه إنه يداوم ( هذا إذا الله وفقه و لقى وظيفه ) يحاول يمشًي الوقت بـــأي وسيله كانت سواء بالجوال وإلا بالنت وإلا بالسوالف والقهوه والشاي وتحليل مباريات العام الماضي وتحليل أسباب دخول هدف ماجد في الصين قبل 20 سنه ثم يأخذ الجريده عشان يقرأ الصفحه الرياضيه وكاريكاتير الهليل .....!!!!

ليش الواحد فينا يوصل البيت ويطق الكبسه وبعدهـــا كاس لبن عشان ينوم النومه الأليمه ....!!!

ليش الواحد فينا مايصحى إلا المغـــرب ويدور على الحلى والقهوه ويهيئ نفسه عشان ينط للشباب في الإستراحه إمــــا عشان المعسل أو عشان يتابع يوميات سخافة أكاديمي .....!!!

ليش الواحد فينا يسهر إلى الساعه ألف في الإستراحه ويروح البيت ينام عشان يستقبل يوم جديد ويعيد سيناريو نفس اليوم اللي فات بكل تفاصيله مع إختلافات بسيطه في نوعية الحلى إللي بعد المغرب وأطــراف النومنيه الخاسر لذاك اليوم ....!!!

ليش الواحد صار موتره يمشي في التحليه بدون أي تدخل منه لأن الموتر صار يدل وحافظ حتى مطبات الشارع وعيون القطط اللي فيه غيب ...!!!

ليش في نهاية الأسبوع نستلم طريق العليا العام من الشيراتون إلى حراج الكمبيوتر مروراً بالمملكه والفيصليه رايح جاي لين صارت السياره اللي موديلها 2007 ماشيه 30000 كم ....!!!

ليش الواحد فينا صار همه إنه يمتلك الجوال رقم (؟؟؟؟؟؟؟؟؟؟؟؟؟05 ) ولوحه السياره تكون ( !!! ) عشان لامر من عند البنات سوالهم كذا

ونتعشى في التحليه ونتغدى في الثلاثين وكله على حساب الفيزا ولاجــاء أخر الشهر حولنا جوالاتنا على موجود إكسترا وإلا نخلي أخواننا الصغار يردون عشان لا يتصل علينا مندوب الفيزا لسداد المستحق ....!!!

ليش صارت أولى أهتمامات الشباب إما كوره أو مكالمات أوالتفحيط الذي ذهب ضحيته المئات



ليش الواحد فينا ترك للوافدين التجاره والتوزيع ومندوبية المبيعات تحت شعار ( خلها وإرفع رأسك إنت سعودي ) .....!!!

ليش الواحد فينا يوم إنه مايلقى وظيفه ينام إلى المغرب ويطلع مع ربعه في الإستراحه إلى الفجر وبعد هذا كله يقووول : وش أسوي مالقيت وظيفه ....!!!

ياشباب بلادي هذا هو للأسف برنامج كلً منا نحن الشباب إلا القليل وهذه هي الحقيقه ....!!!!

والنتيجه أصابنا العجــــز والكســـــــل عن كل شي وللأبد

ومن قوة الكسل والعجزالواحد موب قادر يتفخ الكوره اللي قدامه



أصبحنـــا عاجزين عن الإستيعاب <<< أُنظر لمقابلات الشباب في برنامج عطفاً على السؤال في الإخباريه .....!!!

أصبحنـــا عاجزين عن التنظيم <<< أنظر للوحات المرور الجديده ....!!!





أصبحنـــا عاجزين عن العمل <<< حتى صارت المنتديات تكتب شكر وعرفان لموظف أنجز معامله في يومين مع إنه لم يُضع في مكانه إلا لخدمة الناس وإنجاز معاملاتهم ....!!!

أصبحنــــا عاجزين عن أشـــياء كثيره للأسف .....

حتى إن الغـــرب عَلمَ عن عجزنـــا وقلة حيلتنا حتى إنه قرر أن يصنع لنـــا في عـــام 3000 إختراعات وسيصدرهـــا لنـــا ....

أولاً : هاذي مكينة حلاقه ... تحلق وجهك كله حتى حواجبك إلين يطلع وجهك كره سله

من العجز بس حط وجهك قدام المكينه وهي عليها الباقي ...



ثانياً : هاذي طال عمرك آلة التمارين سلم نفسك لها وهي عليها الباقي

تذكـــرت واحد من العيال الله يذكره بالخير ينام في الطابور وهو يسوي التمرين الصباحي



ثالثاً : حتى وإنت مزكوم لاتشيل أي هم ....

كل اللي عليك قرب خشمك بس وعلى الغرب الباقي







أخي وحبيبي إبن بلادي

أخي وحبيبي إبن بلادي كتبت هذا الموضوع بعد أن رأيت 1000 سياره صنعت محلياً في دوله عربيه مجاوره ....!!!

أخي وحبيبي إبن بلادي كتبت بعد أن رأيت 1000 وافد يحوًل لبلده ملايين الريالات من بلدي في أحد البنوك المحليه ....!!!

أخي وحبيبي إبن بلادي كتبت بعد أن رأيت 1000 وافد يسيطرون بالكامل على سوق الخضار والفواكه في بلدي وإبن بلادي هو العامل براتب لديهم ....!!!

أخي وحبيبي إبن بلادي كتبت بعد أن رأيت 1000 وافد يتحكمون في سوق اإتصالات والجوالات بالكامل ....!!!

أخي وحبيبي إبن بلادي كتبت بعد أن رأيت 1000 وافد يسيطرون على سوق الفضائيات والبرمجه بالكامل ....!!!

أخي وحبيبي إبن بلادي كتبت بعد أن رأيت 1000 وافد يسيطرون على مطاعمنا ومغاسلنا ومحطاتنا وبقالاتنا وليموزيناتنا بالكامل ....!!!

أخي وحبيبي إبن بلادي كتبت بعد أن رأيت 1000 وافد يسيطرون على محلات الأثاث والديكور ومصانع البويات وورش السيارات ومستودعات الزجاج وألمنيوم وبسطات البلاط والإسمنت والرمل ومصانع الرخــام والسيراميك بالكامل ....!!!

بالأمــــانه مـــــاذا بقيً لي ولك

وبعد هذه الخيرات العظام التي يأخذهـــا الوافد من بلدي يهدي هذا الوافد لبلدي مشروب شكر وعرفان وأمتنان



تبي تشوف الشغل المحلي







دعونا نعمل وننجز ....!!!

هل ستنتظر إتصال كريم من مندوب وزارة العمل لتوظيفك تحت الدرج أو بمكتب راقي بداخل دورات المياه ( أجلكم الله ) عند وافد ....!!!

شًمر عن ساعديك ... وإسعى من اليوم في طلب الرزق الحلال والعمل الشريف أياً كـــان

وتوكل على الله سبحانه وأطلبه العون والتوفيق حتى نصف بمصاف الدول الراقيه

وأخــــــــــــــــيراً

أسأل الله أنه ما يجي اليوم هذا



ولا اليوم هذا





وأسأل الله أنه مايجي اليوم اللي أشتغل فيه سواق عند رشيد في الهند وأقوله : عمي رشيد أنــا في 35 بيبي في السأوديه .... لكن أنـــا لازم روح هالحين عشان أنـــا في جــــواج



أسأل الله أن يديم على بلادنـــا الأمن والأمــــان

وأن يكفينا كيد الكائدين وحسد الحاسدين .... وأن يجعل بلدنـــا آمناً مستقراً ياأرحم الراحمين ...

وأن يحفظ لنا وعلينا ديننا مليكنــــا وأهلينا .... اللهم آآآآمين



كتبه غيرة ومحبة في وطنه وأخــــوانه

أخوكم

آفاق

* تم الإستعانه بالصور من عدة مواقع أمـــا نبض الموضوع وصلبه فهو من أخوكم آفاق فمن أراد النقل فله ذلك شريطة أن يذكــر المصدر ...







have a nice day

مشكوووووووور والله عندك حق وااااااااااااايد شباب هالأياااااااااام يبون كل شيء لعندهم ولا يعرفون السعي والبحث<<الى من رحم ربك وهم قليل
وحنا صرااااااااااااااحه مانستغني عن الوافدين.........لأنو هم افادو البلاد اكثر من شبابه<طبعا وجهة
نظر تحترم..................مشكوووووووووووووور

ترى انا بنت وكاتب هادا المقال ولد وانا نقلتة منو للامانة

يسلمووووووووووووووو


روعه الموضوع يسلم يدينك للنقله الحلوه

وهو يسلم لموضوعه الجدي ولهاذا التفكير

يسلمووووووووووووووووووووووو
على الموضوع الرائع

مشكووووووووووووووووووووووووووووووووور ويسلمووووووووووووووووووووووووووووووووو

مشكوووووووووووووووووووره أختي ريرو
وشكر خاص لكاتب الموضوع أفاق
موضوع قد مايضحك أسلوبه ألا أنه يبكي العين محتواه
تحياتي لكم